ചികിത്സ തേടിയെത്തുന്നവരെ നേരിട്ട് ബാധിച്ചേക്കാവുന്ന സാഹചര്യമാണ് സംസ്ഥാനത്തെ സർക്കാർ ആശുപത്രികളിൽ രൂപപ്പെടുന്നത്. നിലവിലെ പ്രതിസന്ധി ഉടൻ പരിഹരിക്കാനായില്ലെങ്കിൽ വരും ദിവസങ്ങളിൽ ആശുപത്രികളുടെ പ്രവർത്തനത്തെ തന്നെ ഇത് ബാധിച്ചേക്കുമെന്നാണ് അധികൃതരുടെ മുന്നറിയിപ്പ്.
പ്രമേഹം, ഉയർന്ന രക്തസമ്മർദ്ദം തുടങ്ങിയ ജീവിതശൈലീ രോഗങ്ങൾക്കുള്ള മരുന്നുകൾക്ക് പുറമേ കീമോതെറാപ്പി, അപസ്മാരം തുടങ്ങിയവയ്ക്കുള്ള മരുന്നുകൾക്കും സർക്കാർ ആശുപത്രികളിൽ കടുത്ത ക്ഷാമമാണ് നേരിടുന്നത്. സ്ഥിതി പൊതുജനങ്ങളിൽ ആശങ്ക സൃഷ്ടിക്കാതിരിക്കാൻ പരമാവധി ലോക്കൽ പർച്ചേസ് നടത്താനാണ് ആശുപത്രികൾക്ക് സർക്കാർ നിർദേശം നൽകിയിരിക്കുന്നത്.
എന്നാൽ ആശുപത്രികൾക്ക് വലിയ തോതിൽ കുടിശ്ശികയുള്ളതിനാൽ സ്വകാര്യ വിതരണക്കാർ മരുന്നുകളും മെഡിക്കൽ ഉപകരണങ്ങളും നൽകാൻ വിമുഖത കാണിക്കുകയാണ്. മെഡിക്കൽ കോളേജ് ആശുപത്രികൾക്ക് പുറമേ പല പ്രധാന ജനറൽ, ജില്ലാ ആശുപത്രികൾക്കും 100 കോടിയിലധികം രൂപയാണ് കുടിശ്ശികയുള്ളത്.
തിരുവനന്തപുരം, എറണാകുളം ജനറൽ ആശുപത്രികൾക്ക് മാത്രം ഏകദേശം 120 കോടി രൂപയാണ് വിതരണക്കാർക്ക് നൽകാനുള്ളത്. കാരുണ്യ ആരോഗ്യ സുരക്ഷാ പദ്ധതിയിലൂടെ സൗജന്യ ചികിത്സ നൽകിയ വകയിലും സർക്കാർ ആശുപത്രികൾക്ക് ലഭിക്കാനുള്ള കോടികൾ കുടിശ്ശികയായി തുടരുകയാണ്. ഇതോടെ അടിയന്തരമായി പണം നൽകി മരുന്നുകൾ വാങ്ങുന്നതും ആശുപത്രികൾക്ക് ബുദ്ധിമുട്ടായി.
അടുത്തയാഴ്ചയോടെ പുതിയ മരുന്ന് സ്റ്റോക്ക് എത്തുമെന്നാണ് ആരോഗ്യവകുപ്പിന്റെ വിശദീകരണം. എന്നാൽ പുതിയ സ്റ്റോക്ക് വൈകിയാൽ സ്ഥിതി കൂടുതൽ സങ്കീർണമാകുമെന്ന് ആശുപത്രി അധികൃതർ വകുപ്പിനെ അറിയിച്ചിട്ടുണ്ട്.
കുടിശ്ശിക തീർക്കുന്നതിനായി വൺ ടൈം സെറ്റിൽമെന്റ് ഉൾപ്പെടെയുള്ള നടപടികളാണ് സർക്കാർ പരിഗണിക്കുന്നത്. പർച്ചേസ് ഓർഡർ നൽകിയിട്ടുള്ള മരുന്നുകളുടെ സ്റ്റോക്ക് വേഗത്തിൽ എത്തിക്കാനും നടപടികൾ സ്വീകരിക്കുന്നുണ്ട്. ചില മരുന്നുകൾക്കായി വീണ്ടും ടെൻഡർ വിളിക്കേണ്ടിവന്നതാണ് നിലവിലെ കാലതാമസത്തിന് കാരണമായതെന്നും അധികൃതർ ചൂണ്ടിക്കാട്ടുന്നു.
Note ; വാർത്തയ്ക്കായി ഉപയോഗിച്ചിരിക്കുന്ന ചിത്രങ്ങൾ ബെസോറ ന്യൂസിന്റെത് അല്ല . വാർത്തയുടെ പൂർണതയ്ക്കുവേണ്ടി മറ്റ് സോഴ്സുകളിൽ നിന്നും എടുത്തതാണ് .
