ചൊവ്വാഴ്ച ഉച്ചയോടെയാണ് നാടിനെ നടുക്കിയ സംഭവം നടന്നത്. ബളാന്തോട് ചാമുണ്ഡിക്കുന്ന് വാതിൽമാടിയിലെ കൃഷ്ണൻ്റെ മകൻ സനൂപ് (25) ആണ് അപകടത്തിൽ മരിച്ചത്. ജോലിയിൽ പ്രവേശിച്ച് തൊട്ടടുത്ത ദിവസമാണ് ഈ ദുരന്തം സനൂപിനെ തേടിയെത്തിയത്.
സിപ് ലൈൻ കേന്ദ്രത്തിൽ, സാഹസിക വിനോദത്തിൽ ഏർപ്പെടാൻ എത്തിയവരെ സുരക്ഷിതമായി കയറ്റി അയക്കുന്ന ചുമതലയിലായിരുന്നു സനൂപ്. സിപ് ലൈനിൽ സഞ്ചരിക്കാനായി എത്തിയ വിനോദസഞ്ചാരിയായ യുവതിയെ സുരക്ഷാ ബെൽറ്റ് ധരിപ്പിച്ച് സനൂപ് യാത്രയാക്കുകയായിരുന്നു.
എന്നാൽ, സിപ് ലൈൻ സ്റ്റാർട്ടിംഗ് പോയിന്റിൽ നിന്നും മുന്നോട്ട് നീങ്ങിയ നിമിഷത്തിൽ ഭയം കാരണം യുവതി സനൂപിൻ്റെ കയ്യിൽ ശക്തമായി കയറിപ്പിടിച്ചു. സനൂപിന് യുവതിയുടെ അപ്രതീക്ഷിതമായ പിടിത്തത്തിൽ നിന്ന് പിന്മാറാൻ കഴിഞ്ഞില്ല.
ഇതോടെ യുവതിക്കൊപ്പം സനൂപും സിപ് ലൈനിൽ തൂങ്ങി മുന്നോട്ട് നീങ്ങുകയായിരുന്നു.
ഭയന്നുവിറച്ച യുവതിയെയും വായുവിൽ തൂങ്ങിനിൽക്കുന്ന സനൂപിനെയും കണ്ട് താഴെ നിന്നവർ നിലവിളിച്ചെങ്കിലും സുരക്ഷാ ഉപകാരണങ്ങളുടെ അഭാവം അപകടത്തിനു കാരണമായി. സ്വന്തം ജീവൻ അപകടത്തിലാണെന്ന് തിരിച്ചറിഞ്ഞിട്ടും സനൂപ് കഴിവിൻ്റെ പരമാവധി പിടിവിടാതെ പിടിച്ചുനിൽക്കാൻ ശ്രമിച്ചു.
ഏകദേശം 300 മീറ്ററോളം ദൂരം യുവതിയോടൊപ്പം സിപ് ലൈൻ കമ്പിയിൽ തൂങ്ങിക്കിടന്ന് ലാൻഡിംഗ് പോയിന്റിന് സമീപം വരെ എത്താൻ സനൂപിന് സാധിച്ചു. എന്നാൽ സെക്കൻഡുകൾ ബാക്കിനിൽക്കെ, കൈ പിടിവിട്ട് താഴെയുള്ള കൂറ്റൻ താഴ്ചയിലേക്ക് പതിക്കുകയായിരുന്നു.
വൻ ഉയരത്തിൽ നിന്ന് താഴെയുള്ള പാറക്കെട്ടുകളും മരങ്ങളും നിറഞ്ഞ താഴ്ചയിലേക്ക് വീണ സനൂപിന് തലയ്ക്കും ശരീരത്തിനും ഗുരുതരമായി പരിക്കേറ്റു. സംഭവസ്ഥലത്തുണ്ടായിരുന്ന ജീവനക്കാരും നാട്ടുകാരും ചേർന്ന് ഉടനടി രക്ഷാപ്രവർത്തനം നടത്തിയെങ്കിലും ജീവൻ രക്ഷിക്കാൻ സാധിച്ചില്ല.
