സ്ത്രീകൾക്ക് കെഎസ്ആർടിസി ഓർഡിനറി ബസുകളിൽ സൗജന്യ യാത്ര അനുവദിക്കുന്ന ‘പ്രിയദർശിനി യാത്രാ പദ്ധതി’ നാളെ നൂറ് ദിവസം പൂർത്തിയാക്കും. സ്ത്രീകളുടെ യാത്രാ ചെലവ് കുറയ്ക്കുന്നതിനും പൊതുഗതാഗത സംവിധാനത്തിലേക്ക് കൂടുതൽ സ്ത്രീകളെ എത്തിക്കുന്നതിനുമായി 2026 ജൂൺ 15നാണ് പദ്ധതി ആരംഭിച്ചത്.
പദ്ധതി ആരംഭിച്ച് നൂറ് ദിവസം പിന്നിടുമ്പോൾ കെഎസ്ആർടിസി ഓർഡിനറി ബസുകളിലെ വനിതാ യാത്രക്കാരുടെ എണ്ണത്തിൽ 60 ശതമാനം വർധനവുണ്ടായതായി കെഎസ്ആർടിസി അറിയിച്ചു. സൗജന്യ യാത്രാ സൗകര്യം കൂടുതൽ സ്ത്രീകളെ ദൈനംദിന യാത്രകൾക്ക് കെഎസ്ആർടിസിയെ ആശ്രയിക്കാൻ പ്രേരിപ്പിച്ചതായാണ് വിലയിരുത്തൽ.
വിദ്യാഭ്യാസം, തൊഴിൽ, ചികിത്സ തുടങ്ങിയ ആവശ്യങ്ങൾക്കായി സ്ഥിരമായി യാത്ര ചെയ്യുന്ന സ്ത്രീകൾക്കും പദ്ധതി സാമ്പത്തിക ആശ്വാസമായി. യാത്രാ ചെലവ് കുറയ്ക്കുന്നതിനൊപ്പം സുരക്ഷിതവും സൗകര്യപ്രദവുമായ പൊതുഗതാഗതം കൂടുതൽ സ്ത്രീകൾക്ക് ലഭ്യമാക്കാനും പദ്ധതിക്ക് കഴിഞ്ഞു.
സ്ത്രീകളുടെ സാമൂഹികവും സാമ്പത്തികവുമായ ശാക്തീകരണത്തിന് പൊതുഗതാഗതത്തെ കൂടുതൽ പ്രയോജനപ്പെടുത്തുക എന്ന ലക്ഷ്യത്തോടെയാണ് ‘പ്രിയദർശിനി യാത്ര’ നടപ്പാക്കിയത്. നൂറാം ദിനത്തിലെത്തുമ്പോൾ കൂടുതൽ സ്ത്രീകളെ പൊതുഗതാഗത സംവിധാനത്തിന്റെ ഭാഗമാക്കാനും കെഎസ്ആർടിസി സേവനങ്ങളെ കൂടുതൽ ജനസൗഹൃദമാക്കാനും പദ്ധതിക്ക് സാധിച്ചെന്നാണ് കോർപറേഷന്റെ വിലയിരുത്തൽ.
Note ; വാർത്തയ്ക്കായി ഉപയോഗിച്ചിരിക്കുന്ന ചിത്രങ്ങൾ ബെസോറ ന്യൂസിന്റെത് അല്ല . വാർത്തയുടെ പൂർണതയ്ക്കുവേണ്ടി മറ്റ് സോഴ്സുകളിൽ നിന്നും എടുത്തതാണ് .
