ഇറ്റലിയിൽ സ്കൂൾ വിദ്യാഭ്യാസവുമായി ബന്ധപ്പെട്ട് പുതിയ നടപടികൾ പ്രഖ്യാപിച്ച് പ്രധാനമന്ത്രി ജോർജിയ മെലോണി.
വിദേശ വിദ്യാർത്ഥികളുടെ എണ്ണം ഒരു ക്ലാസിൽ പരിമിതപ്പെടുത്തുന്നതിനുള്ള നിയമനിർമാണ നടപടികൾ ഉടൻ മന്ത്രിസഭയുടെ പരിഗണനയ്ക്ക് കൊണ്ടുവരുമെന്ന് മെലോണി അറിയിച്ചു.
ഇറ്റാലിയൻ ഭാഷ പഠിക്കുന്നതിലും സ്കൂൾ സംവിധാനവുമായി പൊരുത്തപ്പെടുന്നതിലും ഗുരുതര ബുദ്ധിമുട്ടുകൾ നേരിടുന്ന വിദേശ വിദ്യാർത്ഥികളുടെ മാതാപിതാക്കൾ ഇറ്റാലിയൻ ഭാഷ പഠിക്കണമെന്നും പുതിയ നിർദേശത്തിൽ വ്യക്തമാക്കുന്നു.
സ്കൂളുകളിൽ ബുർഖയും നിഖാബും ഉൾപ്പെടെയുള്ള മുഖം മറയ്ക്കുന്ന വസ്ത്രങ്ങൾക്ക് നിരോധനം ഏർപ്പെടുത്തുമെന്നും പ്രധാനമന്ത്രി വ്യക്തമാക്കി. വിദ്യാർത്ഥികൾ മുഖം മറയ്ക്കാതെയാണ് സ്കൂളിൽ എത്തേണ്ടതെന്നും മെലോണി പറഞ്ഞു.
ഒരു ക്ലാസിൽ ഇറ്റാലിയൻ ഭാഷ അറിയാത്ത ഒരു കുട്ടിയാണെങ്കിൽ സഹപാഠികളുടെയും അധ്യാപകരുടെയും സഹായത്തോടെ ഭാഷ പഠിച്ച് സ്കൂൾ സമൂഹവുമായി വേഗത്തിൽ ഇണങ്ങാൻ സാധിക്കുമെന്ന് മെലോണി വിശദീകരിച്ചു.
എന്നാൽ ഇറ്റാലിയൻ ഭാഷ മനസ്സിലാകാത്ത കുട്ടികളുടെ എണ്ണം വളരെ കൂടുതലാകുകയോ ഭൂരിപക്ഷമാകുകയോ ചെയ്താൽ അത് യഥാർത്ഥ ഏകീകരണമല്ലെന്നും അവഗണനയാണെന്നും മെലോണി പറഞ്ഞു.
ഇറ്റാലിയൻ കുട്ടികൾക്ക് സ്വന്തം ക്ലാസ് മുറിയിൽ ന്യൂനപക്ഷമായെന്ന തോന്നൽ ഉണ്ടാകരുതെന്നും പ്രധാനമന്ത്രി വ്യക്തമാക്കി.
യഥാർത്ഥമോ സങ്കൽപ്പിതമോ ആയ ഏതെങ്കിലും പാരമ്പര്യത്തിന്റെ പേരിൽ ഒരു യുവതിക്ക് മുഖം മറയ്ക്കണമെന്ന് ഇറ്റലിയിൽ ആരും തീരുമാനിക്കാനാകില്ലെന്നും മെലോണി കൂട്ടിച്ചേർത്തു.
വിദേശ വിദ്യാർത്ഥികളുടെ കൃത്യമായ പരമാവധി എണ്ണം ഒരു ക്ലാസിൽ എത്രയായിരിക്കുമെന്ന് മെലോണി ഇതുവരെ വ്യക്തമാക്കിയിട്ടില്ല.
Note ; വാർത്തയ്ക്കായി ഉപയോഗിച്ചിരിക്കുന്ന ചിത്രങ്ങൾ ബെസോറ ന്യൂസിന്റെത് അല്ല . വാർത്തയുടെ പൂർണതയ്ക്കുവേണ്ടി മറ്റ് സോഴ്സുകളിൽ നിന്നും എടുത്തതാണ് .
