ഇറാനിലെ നിർബന്ധിത ഹിജാബ് നിയമങ്ങൾക്കെതിരെ വ്യത്യസ്തമായ പ്രതിഷേധവുമായി നൂറുകണക്കിന് യുവതികൾ. തലസ്ഥാനമായ ടെഹ്റാനിൽ നടന്ന പ്രധാന റോഡ് റേസിലാണ് സ്ത്രീകൾ ഹിജാബ് ധരിക്കാതെ മത്സരത്തിൽ പങ്കെടുത്തത്. ഭരണകൂടത്തിന്റെ കടുത്ത നിയന്ത്രണങ്ങൾ നിലനിൽക്കുന്നതിനിടെയാണ് പരസ്യമായ ഈ നിയമലംഘനം.
ടെഹ്റാനിലെ പ്രശസ്തമായ വേലായത് പാർക്കിലാണ് 10 കിലോമീറ്റർ റോഡ് റേസ് നടന്നത്. പുരുഷന്മാർക്കും സ്ത്രീകൾക്കും പ്രത്യേകം വിഭാഗങ്ങളിലായാണ് മത്സരം സംഘടിപ്പിച്ചത്. സ്ത്രീകളുടെ വിഭാഗത്തിൽ 10 കിലോമീറ്റർ പൂർത്തിയാക്കാൻ രണ്ട് ലാപ്പുകളായാണ് ട്രാക്ക് ക്രമീകരിച്ചിരുന്നത്. മത്സരത്തിന് ആയിരക്കണക്കിന് ആളുകൾ സാക്ഷികളായിരുന്നു.
എന്നാൽ ശ്രദ്ധേയമായത് മത്സരത്തിൽ പങ്കെടുത്ത സ്ത്രീകളുടെ വേഷമായിരുന്നു. ഭൂരിഭാഗം വനിതാ കായികതാരങ്ങളും ശിരോവസ്ത്രം പൂർണമായും ഒഴിവാക്കിയാണ് ഓട്ടത്തിൽ പങ്കെടുത്തത്. ഇറാനിൽ സ്ത്രീകൾക്ക് ഹിജാബ് നിർബന്ധമാക്കുന്ന നിയമങ്ങൾ നിലവിലുള്ള സാഹചര്യത്തിലാണ് ഇത്രയും പേർ ഒരുമിച്ച് തലമൂടാതെ പൊതുസ്ഥലത്ത് പ്രത്യക്ഷപ്പെട്ടത്.
മത്സരത്തിനിടെ പകർത്തിയ ചിത്രങ്ങളും വീഡിയോ ദൃശ്യങ്ങളും പിന്നീട് സാമൂഹിക മാധ്യമങ്ങളിൽ വ്യാപകമായി പ്രചരിച്ചു. വളരെ വേഗത്തിലാണ് ഇവയ്ക്ക് വലിയ പ്രചാരം ലഭിച്ചത്. ഇതോടെ സംഭവത്തെക്കുറിച്ച് ഇറാനിലും രാജ്യാന്തര തലത്തിലും രാഷ്ട്രീയ, സാമൂഹിക ചർച്ചകളും ശക്തമായി.
കടുത്ത നിയന്ത്രണങ്ങളും നിയമലംഘനത്തിന് ശിക്ഷാനടപടികൾ നേരിടേണ്ടിവരാനുള്ള സാധ്യതയും നിലനിൽക്കെയാണ് സ്ത്രീകൾ ഇത്തരത്തിൽ പരസ്യമായി ഹിജാബ് ഒഴിവാക്കിയത്. അതുകൊണ്ടുതന്നെ ഇറാനിയൻ സമൂഹത്തിൽ വലിയ മാറ്റങ്ങൾക്കുള്ള സൂചനയാണോ ഈ കൂട്ടായ പ്രതിഷേധമെന്ന ചർച്ചയും ഉയരുകയാണ്.
കഴിഞ്ഞ വെള്ളിയാഴ്ചയാണ് ടെഹ്റാൻ 10കെ എന്ന പേരിലുള്ള ഈ ദീർഘദൂര ഓട്ടമത്സരം നടന്നത്. കായിക മത്സരത്തിന്റെ വേദിയെ തന്നെ നിർബന്ധിത വസ്ത്രനിയമത്തിനെതിരായ നിശബ്ദ പ്രതിഷേധത്തിനുള്ള ഇടമാക്കി മാറ്റുകയായിരുന്നു സ്ത്രീകൾ. സംഭവം സംബന്ധിച്ച ദൃശ്യങ്ങൾ സമൂഹമാധ്യമങ്ങളിൽ കൂടുതൽ പ്രചരിക്കുന്നതോടെ പ്രതിഷേധത്തിന്റെ രാഷ്ട്രീയ, സാമൂഹിക പ്രതിഫലനങ്ങളും ചർച്ചയാകുകയാണ്.
Note ; വാർത്തയ്ക്കായി ഉപയോഗിച്ചിരിക്കുന്ന ചിത്രങ്ങൾ ബെസോറ ന്യൂസിന്റെത് അല്ല . വാർത്തയുടെ പൂർണതയ്ക്കുവേണ്ടി മറ്റ് സോഴ്സുകളിൽ നിന്നും എടുത്തതാണ് .
