വിവാദമായ മുട്ടിൽ മരംമുറി കേസിലെ വഞ്ചനാ കുറ്റവുമായി ബന്ധപ്പെട്ട് ചോറ്റാനിക്കര കോടതിയിൽ നടക്കുന്ന വിചാരണ നടപടികൾ സ്റ്റേ ചെയ്യണമെന്ന പ്രതികളുടെ ആവശ്യം ഹൈക്കോടതി തള്ളി. കേസിലെ മുഖ്യപ്രതികളായ അഗസ്റ്റിൻ സഹോദരന്മാർ നൽകിയ ഹർജിയാണ് കോടതി നിരസിച്ചത്.
കുറ്റപത്രം വായിച്ചുകേൾപ്പിക്കുന്ന ചടങ്ങുകൾക്കായി വരും തിങ്കളാഴ്ച നേരിട്ട് ഹാജരാകാൻ ചോറ്റാനിക്കര കോടതി പ്രതികൾക്ക് നേരത്തെ നിർദ്ദേശം നൽകിയിരുന്നു. എന്നാൽ, വയനാട്ടിലും ചോറ്റാനിക്കരയിലും തങ്ങൾക്കെതിരെ രജിസ്റ്റർ ചെയ്തിട്ടുള്ള കേസുകൾ ഒരേ കുറ്റകൃത്യവുമായി ബന്ധപ്പെട്ടതാണെന്നും അതിനാൽ ഇവ വെവ്വേറെയായി കാണാതെ ഒന്നായി പരിഗണിച്ച് വിചാരണ നടപ്പാക്കണമെന്നുമായിരുന്നു പ്രതിഭാഗത്തിന്റെ പ്രധാന വാദം.
എന്നാൽ പ്രതികളുടെ ഈ വാദത്തെ സർക്കാർ അഭിഭാഷകൻ ശക്തമായി എതിർത്തു. വയനാട്ടിലെയും ചോറ്റാനിക്കരയിലെയും കേസുകൾ വ്യത്യസ്ത സംഭവങ്ങളുമായി ബന്ധപ്പെട്ടതും വെവ്വേറെ സ്വഭാവമുള്ളതുമാണെന്ന് സർക്കാർ ഹൈക്കോടതിയിൽ വ്യക്തമാക്കി. സർക്കാരിന്റെ വാദം അംഗീകരിച്ച കോടതി, വിചാരണ സ്റ്റേ ചെയ്യാൻ വിസമ്മതിക്കുകയും ഹൈക്കോടതിയുടെ ഉത്തരവോടെ ചോറ്റാനിക്കര കോടതിയിലെ തുടർന്നുള്ള കേസ് നടപടികളുമായി മുന്നോട്ടുപോകാൻ വഴിതുറക്കുകയും ചെയ്തു.
Note ; വാർത്തയ്ക്കായി ഉപയോഗിച്ചിരിക്കുന്ന ചിത്രങ്ങൾ ബെസോറ ന്യൂസിന്റെത് അല്ല . വാർത്തയുടെ പൂർണതയ്ക്കുവേണ്ടി മറ്റ് സോഴ്സുകളിൽ നിന്നും എടുത്തതാണ് .
